『囍』❤ 簽名筆@【Lovely Wedding Workshop】

o係網上搵到Fiona幫我做o左4支簽名筆呀~~

(好多人搵佢幫手整o架，仲整得好靚o架~)
哩兩款我都好鍾意呀~~
花花好多地方都有~不過哩個加o左蘋果仔~
覺得好得意好特別~
另外，心心o個款我勁鍾意o添呀~~出面冇見過呀~~

第一次煮飯仔 by Kenneth~^^

入伙之後，我地終於正正式式第一次煮飯仔呀~~^^

哩餐o係由我屋企o既大廚Kenneth主理o架~~
唔係因為佢煮得好~而係因為...
我唔識煮，佢叫做識囉...哈哈^^

我地下晝出去街市買餸~~(其實都係超級市場囉...)
不過行o左好耐，又諗o左好耐都唔知食咩好...
最後就買o左兩塊醃好o左o既蒜味豬扒、一隻雪藏蟹(唔係雪場蟹喎~)、一份有晒調味o既青口~~
之後Kenneth就返屋企煮飯喇~~
我就去o左超級市場買Dreyer's Cookie n' Cream家庭裝雪糕俾Kenneth做飯後甜品~~



1) 俾Kenneth煮燶o左o既豬扒呀!!!


2) 清蒸o既雪藏皇帝蟹~~
    好多蟹膏~~由於係雪藏o野，所以d蟹肉係唔好食o既...所以主要係食蟹膏~~^^


3) 豉汁蒜茸蒸青口~
    哩個係調好晒味，成份買返o黎o架~~所以好好味~~但我覺得鹹o左少少囉...

『囍』❤ 第一次姊妹聚會

今日終於舉行o左第一次姊妹聚會喇~

好多謝咁多位姊妹都能夠出席~真係非常感謝呀~
因為要咁多人同一日出席，其實都幾難o架...
始終大家都有各自o既生活丫嘛...
所以今日真係好開心~~^^

今次出o黎o既目的，
第一，就梗係要派帖啦~
第二，傾下當日個rundown~
其實我真係唔識點樣預d時間呀...
同埋中段佢地又有咩做呢??
俾佢地休息，佢地又覺得好悶喎...
但辛苦o左成個上晝，點都要抖抖卦...
唉...有冇人可以教下我點呢??
第三，傾下玩咩接新娘遊戲~
平時做伴娘同姊妹時，由於o個個係人地老公，所以唔敢玩得太盡~
不過今次就唔同喇~~
自己老公就梗係叫d姊妹玩盡d啦~~
Yeah~~諗起都好開心呀~~哈哈^^~
第四，姊妹們都要傾下佢地自己當日o既裝扮~
最後佢地決定o左上午就著便服，夜晚o係酒樓先換返姊妹裙~
我對哩樣o野就真係冇咩所謂，只係要求佢地一致囉...
一係就全部便服，一係就全部姊妹裙...唔好一樣一d就得喇...

最後最後，我真係要非常多謝一位由細玩到大o既朋友呀~
因為有位姊妹臨時話做唔到姊妹...
於是我就好遲先搵佢幫手...
佢冇介意過我咁遲先搵佢，
再加上佢當日都有親戚結婚，
但佢都選擇o黎幫我手...
真係唔知點多謝佢好呀!!
總之，我真係覺得自己好幸福呀~
有咁多位好姊妹~~^3^~~

『囍』❤ 婚紗晚裝鞋

一路以來我都冇打算買對正正經經o既婚紗鞋o係結婚o個日著...

因為覺得著一次好唔抵，之後真係冇機會再著返...
加上d婚紗晚裝件件都咁長，蓋住對鞋都冇人睇到o架啦~~
所以一路都係物色一d普通o既高踭鞋...
起碼之後都可以著多幾次丫~
最近，無意中行過《香工》...
見到好多舖頭都做緊清貨...
所以我就走去八卦下~~
就係咁，俾我o係其中一間舖頭見到有對晚裝鞋幾靚~
價錢又幾抵~~
就係哩對喇~可以襯敬酒同送客o個兩套晚裝呀~~^^


仲有下面哩對係行銅鑼灣o既時候買o架~~
閃d~可以襯婚紗同迎賓o個套晚裝~~^^

『囍』❤ 結婚花車@【力天】

其實一路都覺得結婚花車不是太重要...

可能係我冇咩要求啦...
我唔需要倫敦的士；亦唔需要特別o既車牌號碼...
所以佢對我o黎講只係一種代步o既工具...
亦因為係咁，我就遲遲都未book車囉...
同埋Kenneth二姐夫都話可以用佢架車做花車...
不過我地又唔想麻煩人地...
所以都係俾d錢租車囉~
租車都有個好處...就係包埋花車o既裝飾~
咁樣自己可以煩少樣~~^^ 

所以今日就去婚紗展睇睇~~
因為book咩買咩都好，都係o係婚紗展book/買係最抵o架~
而我就o係【力天花車服務有限公司】book o左車~
(佢係連續2年成為全港唯一生產力促進局及生活易認可之花車租賃優質婚禮商戶，我諗衰極有個泡卦...)
Combo A : Mercedes Benz S-class (W220) + 24-seater van
佢有即場抽獎，大獎係全單半價；二獎係全單八折；三獎係全單九折；四獎係全單減$100；五獎係百佳超級市場現金劵$50
總之一定有獎~~
而我就抽到四獎~~即係全單減$100~~^^v~

『第56屆秋日婚紗、婚宴及結婚服務博覽』

今次應該會係結婚前最後一次行婚紗展喇...

o係籌備一年多o既時間入面，都行過好幾次喇...
其實次次婚紗展擺o既攤位，大致上都係一樣...
只係我地每次去o既目的都唔同，所以先行o左咁多次囉~~

5th Anniversary Dinner@【Marco Polo HongKong Hotel】-【Lobby Lounge】

今年6月行婚紗展o既時候，抽中o左大獎~

其中一份獎品係：
香港馬可勃羅酒店送出酒店大堂餐飲禮劵價值$800
由於張餐飲禮劵只可以用到今年9月30日...
o係哩段時間入面又冇咩特別o既日子需要慶祝...
於是，我地就決定o係今日(拍拖5週年)去食o左佢~~

咁大個女除o左o係酒店食過buffet之外...
都冇去過酒店入面o既其他餐廳食o野呀!!
今次係第一次咋...(好似鄉下妹咁...=.=")
去到之後，打開本meun睇睇...
嘩...全部都係英文o黎o架...
d字仲好深o添...有d真係唔知係咩o黎...
於是，我地就叫d我地識睇o既o野食囉...哈哈^^
我地點o左兩個主菜：一份羊架；一份銀雪魚
兩個甜品：一份梨批；一份黑森林
仲有兩杯有酒o既咖啡
加埋一之後，總數$870.1
扣o左張餐飲禮劵之後，我地只係俾$70.1~
哈哈^^好開心呀~
真係一次好難忘o既經歷呀~

梳化&洗衣機駕到~

今日又有貨收喇~~

就係梳化同洗衣機呀~~

好o野~~有梳化~~
終於可以舒舒服服咁坐下喇~~^^
又可以招呼下朋友上o黎坐~~
有洗衣機~~
咁樣我地就可以自己洗衫，
唔洗住兩日又要拎d衫返屋企換lu~~^^

而家期待雪櫃送貨呀~
咁就基本要用o既傢俬電器都齊喇~~

❤ 5th Anniversary ❤

週年喇~~

唔經唔覺咁就5年...
仲有唔夠一個月我地就會踏入人生另一個階段...
雖然已經籌備o左一年多，
但係唔知點解...
當淨返一個月時間o既時候，
就覺得自己未做好心理準備咁...
究竟點解???

溫馨提示：仲有1個月就變師奶

2nd Fitting@【Mee Wedding】

今日終於都去o左【Mee Wedding】2nd Fitting喇~~

主要目的就係再試下d新返o既婚紗晚裝，同埋要定款喇~~
我都有試到佢d新婚紗晚裝...
不過最後我都冇轉到款~~^^
仍然係維持最初o既決定~~

婚紗~
到時會幫我再縮多d泡泡，會再泡d~~


迎賓晚裝~
超靚~超鍾意呀~~^^
著o左唔捨得除返落o黎...


敬酒晚裝~
到時隻袖會幫我縮細d~~


送客晚裝~
到時後面仲會有條粉紅色o既小拖尾o架~


裙褂~
好多個用閃石釘成o既"囍"字~~

入伙禮物の五 ღ 雪櫃@【豐澤】by Frankie

終於買o左雪櫃喇~~

雪櫃真係幾重要o架!!!
有o左佢...我就可以買多d o野食返o黎整...(都係諗下o既o者...^^)

今日去【豐澤】買洗衣機時就順便買埋雪櫃喇...
最後我地揀o左Hitachi o既雪櫃...
自己朋友同網上o既人都一致話Hitachi好呀~
多謝Frankie~~^^

最後，個sales仲"R"o左部三文治機俾我地呀~~
真係多謝~~
但應該會比較少用啦...

入伙禮物の四 ღ 洗衣機@【豐澤】by 火柴

唔識洗衫o既我，終於都要面對現實喇...

而家o既衫一部份媽媽洗，另一部份我就拎出街洗...
不過結婚之後，我就要自己搞掂喇...

煮飯、洗碗、拖地...哩d暫時都係由Kenneth做...
不過原來佢都唔識洗衫o架...冇得叫佢做埋...T^T"
所以...我諗我同佢都要一齊學喇...

唔識洗衫，當然連洗衣機都唔識買啦!!
只係聽大部份人講【金章】洗衣機最好~
不過價錢好貴呀!!
朋友送o既，當然唔想洗人咁多錢，所以都唔會買咁貴喇...
之前諗住買【白朗】o架...
不過最後都係買o左【西門子】...
sales話好...不過唔知真定假...
佢部大部份標準洗衣機已經係有AA級...(類似香港O既能源標籤咁啦~)
而【西門子】就有A+A喎~即係人地A，佢就係A+囉...
但對於兩個都唔識洗衫o既人o黎講...
所以買部平平地好喇...
因為我地都唔知會唔會玩爛佢丫嘛...^^"

多謝火柴~~^^

製造『炸彈』~~^^v~

完成o左過大禮之後...

我就變身做『炸彈人』喇~~
所以今日同Kenneth媽媽試完衫之後...
二家姐二姐夫同Kenneth媽媽就去o左我地新屋度坐，
而我就返屋企開始──製‧造‧炸‧彈

不如睇睇我製造『炸彈』要用o既材料先啦~~

最緊要有o既當然係囍帖啦~~
仲有就係西餅咭、利是、地圖咭...
原來仲有張金豬禮劵o架...(我o既長輩先會有o架...)
哩個好似係代替o左回門時o既乳豬o架喇~~


暫時只係製造o左女家親戚o既『炸彈』...
其餘o個d...我要再努力d，快d整晒佢喇...^^

『囍』❤ 奶奶晚裝

過完大禮之後，佢地就去接Kenneth媽媽一齊去飲茶...

我同Kenneth就收工後join佢地~
而今日出o黎o既主要目的其實係租奶奶晚裝呀~~
所以飲完茶之後...
我地就一行6人去o左《金都》~
Kenneth媽媽睇o左幾間，亦都試o左幾件衫...
不過都係未睇o岩...
最後，佢地去返二家姐結婚時租衫俾媽咪o個間度租呀~~
好o野~~終於都搞掂喇~~

『囍』❤ 過大禮

今日終於順利完成o左過大禮喇~

之前擇日子o既時候，師傅已經幫我地定o左今日(11:00am-1:00pm)過大禮...

而o係8月頭o既時候，Kenneth亦都請o左佢兩個家姐代表男家去女家過大禮~
所以今日佢地差不多12點就到o左我屋企(即係女家)~
佢地除o左拎我地尋日俾佢o個兩籃過大禮物品之外...
原來Kenneth媽媽仲叫家姐佢地要買d唐餅同西餅上我屋企...
所以佢地都唔少o野拎呀...
真係辛苦佢地喇...
而二家姐二姐夫尋晚去完沙田拎我地d o野之後，仲同我地去食o野，
所以都好夜先返到屋企...
今朝又要咁早起身...
真係辛苦晒!!!

今日過大禮o既o野呀~好簡單o架咋~


今日我同Kenneth都要返工呀...
所以都唔知個過程係點...
不過過程係點都好啦...
我淨係知道...我同Kenneth將會變身做『炸彈人』呀~~哈哈^^

攞過大禮物品@【凱麗】&【榮華】

聽日就要過大禮喇...

所以今晚要去攞返之前訂o左用o黎過大禮o既o野呀...
o個兩籃o野都幾重o架...


仲有攞埋男女家上頭用品，男女各一份~


之後再返沙田o既【榮華】攞返之前訂o既龍鳳餅~


11點左右，二家姐二姐夫就揸車o黎車走我地過大禮o既o野...
準備聽日大家姐同二家姐代表男家去女家過大禮~

買四式海味

過大禮仲爭海味未買...

所以今日放工就要去買埋喇...

爸爸話千祈唔好買鮑、參、翅、肚呀!!!
因為買o左俾佢，佢地都唔識整o黎食喎...
所以佢揀o左d好簡單o既海味，
就係──
髮菜、蠔豉、蝦乾、吊片
除o左髮菜係買一両之外，其他都係買一斤就夠喇~
我地仲叫老闆將每款都平均分成兩包，咁就方便回禮啦~~

『囍』❤ 利是封@【JNC Wedding 緣‧坊】

我o既利是封呀~~

係咪好靚呢~~(前後都咁靚o架~)
同出面o個d款好唔同o架~~
但竟然係免費o架~~
冇錯!!你冇睇錯!!
的確係免費，即係唔洗錢o架~~
但點解會有d咁著數o既o野呢???

其實係因為...
早排o係網上見到哩間舖頭，見到佢d利是封好靚~
於是我都訂返d玩下~~
我訂o左上圖款o既短利是封200個&長利是封(即上圖o既size)80個...
而個"囍"字係我要求印桃紅色o既...
(佢本身個sample係有紅色同銀色兩款)
落o左order等到8月頭終於都送貨喇~~
不過當我收到貨之後，就呆o左，
因為我只係收到200個長利是封...
短利是封一個都冇...
於是我打俾負責人，佢都唔知哩件事...
乜交貨前唔係都應該睇下d貨o岩唔o岩o既咩??
咁都可以俾人??
佢打去廠問o既時候先知係間廠做錯o左...
於是佢就要再做過...
不過要17/8先有得攞...
我當然唔接受啦...
最後，佢退返之前所有o既貨款俾我...
同時，哩200個長利是封佢俾埋我，唔會收返走...

就係咁樣，我就有200個免費利是封用喇~~
雖然個帖封唔夠入個咁長o既利是封，
不過為o左唔好浪費...
所以我都諗o左個小辦法~~
就係將個利是去對摺，然後用個封口位遮住個利是封尾...
再用我d靚靚婚禮貼紙貼住佢~~
咁樣都幾好丫~~
慳返d買利是封錢丫嘛~~^^

摺好o左就係咁o既樣囉↓

簽《擬結婚通知書》@【周啟邦律師事務所】

之前去o左【世紀見証】交《擬結婚通知書》，

而家做好o左d文件，所以就要去簽返個名~
所以今日就約o左5點鐘去【周啟邦律師事務所】簽《擬結婚通知書》~
明明係搵【世紀見証】o既律師做婚姻監禮人o架嘛...
但點解會去【周啟邦律師事務所】簽文件咁奇怪o既呢??
原因係...
【世紀見証】o既律師全部都係用【周啟邦律師事務所】o既律師o架~

撩o左幾隻龜，所以好快就走得lu~

『囍』❤ 成長片段@【幸福宣言】

上星期【幸福宣言】打o黎話隻成長片段o既DVD有得攞喇~~

於是就約o左今晚上去攞~~

去到之後，佢就開o黎俾我地睇一次，
睇下有冇咩唔鍾意要再改...
不過我地都冇咩所謂...
加上都覺得OK~
所以就收o左貨喇~~

※ 自己睇自己o既成長片段，都覺得幾sweet喎~~

『囍』❤ 褂鞋@【有利】

以前成日行過旺角，都見到有檔鞋舖(o係NOKIA維修中心隔離)賣結婚o既鞋...

不過就冇人睇檔o既...
上網睇見人地話哩間舖叫【有利】，佢o既鞋好平，
所以我都慕名去睇下~~

原來佢樓上仲又更多款o架...
上到去仲見到好多人試緊鞋...
於是我都唔執輸，揀o左對有踭o既褂鞋試試~~
(其實我想買平底o架，不過好多人都同我講著有踭靚d~)
試o左上腳又幾好睇喎~~
於是就買o左佢喇~~

入伙禮物の三 ღ 梳化@【DSC】by 細佬

入伙前，細佬已經講好o左送梳化俾我o架喇~~

所以就叫我自己去睇，睇o岩買完俾返錢我~~

我同Kenneth都睇o左&試o左好多梳化呀...
最後Kenneth最鍾意【DSC】一張三座位o既啡色梳化囉~
其實隻色我就唔係幾鍾意o架喇...因為太深色...
不過可以加個布套套住佢o既...
但係就坐得幾舒服，而價錢又幾抵...
所以就決定買哩張囉~~

多謝細佬~~
細佬除o左俾返張梳化o既錢我之外，仲俾多$1,000我買其他o野呀~~^^

訂龍鳳餅@【榮華】

過大禮仲要有龍鳳餅~~

由於餅舖唔係成日都會有現貨，所以最好就訂定啦~
咁樣就一定有喇~~
所以我地都去【榮華】訂o左兩對龍鳳餅~~
(因為男女家各一對，所以要兩對囉~)
星期五晚去《金都》攞完過大禮o既o野之後再去【榮華】攞~

其實龍鳳餅o係要o黎上頭時用o既...
即係過o左大禮之後要擺成個月...
唔知到時發o左毛未呢??@_@??

取囍帖@【Joy’s Card】

今日有囍帖攞喇~~

真係好準時!!!
話o左8號就8號~~

距離派帖o既日子越o黎越近喇...
好緊張呀!!!

ღ我的囍帖ღ
平平無奇，簡簡單單的一張囍帖~


本來另一邊咩都冇o架...
但係又覺得好似怪怪地咁...
所以就加印o左我地o既英文名喇~~都幾靚丫~~

『囍』❤ 花球@【Trinice Flowers】

4月o既時候，我o係【Trinice Flowers】落o左訂做婚禮當日o既結婚花球，

於是早幾日就收到電話叫我上去confirm花球款喇~

之前自己都睇o岩o左一個心水款o架~
不過上到去都睇下佢有冇咩款更加靚~
最後見到有個都幾鍾意o既...
於是，二揀一...三心兩意o左好耐...
不過Trinice真係好nice，冇嫌我阻住佢囉...哈哈^^
仲俾o左好多意見我...
但最後我都係揀返自己心水o既款~(即係我自己俾款佢做~)

登登登登~~~就係哩個喇~~~
粉紅色風信子、粉紅色小牡丹花球、白色小蕙蘭、粉紅色美國玫瑰及白色桔梗花球

訂花女花球

今次真係無心插柳柳成蔭~

其實一路都冇諗住搵花仔花女o架...
因為我地都唔係o係教堂行禮，所以都覺得冇哩個需要...

咁o岩今日Sally帶埋昕昕陪我去《金都》訂過大禮o既o野...
訂完o野之後，我地就o係《金都》行下...
行過一間賣花球o既舖頭，我就想入去睇下d襟花同手花...
o個度仲有d細細個o既花球，我就攞o左個俾昕昕拎住...
昕昕似乎都好鍾意咁，我地就拎多幾個俾佢揀~
最後我就同昕昕講:你錫我一啖，我就買個俾你啦~
點知昕昕二話不說就錫o左我面珠一啖喇~~哈哈^^
咁我唔買都唔得啦~~

不過真係好多謝Sally借出佢個寶貝女俾我~
佢可能覺得我唔好意思開口，所以就主動話可以叫佢個女做花女...
但夜晚進場時，真係太黑，我怕會跌親佢囉...

而Kenneth o既大家姐上次o黎我地新屋時，都主動話可以叫佢個仔做花仔呀~~
多謝大家都咁盛意拳拳呀~~

訂過大禮物品@【凱麗】

下個星期六(15/8)係我地過大禮o既日子~

不過我就真係咩都未準備，因為我都唔知點搞...
所以就問下朋友...
問o左3個朋友仔，3個都有唔同...
Kelly就全部都用利是代替；
Fion就買d基本o野，其他o野都係用利是代替；
Sally就酒店幫佢搞掂晒，所以佢都唔知有咩...

於是尋日就去《金都》睇睇...
原來間間o既o野都一樣，價錢都一樣...
不過其中有一間細細間o既舖頭【凱麗】，個阿姐好好人，講解得好詳細...
而我問o左佢好多o野，佢都好樂意為我解答~^^
(其他舖頭好似唔憂做咁，冇咩服務，又黑口黑面咁...好似唔志在做你幾百蚊生意咁...)

返去問過爸爸媽媽之後，就決定只係買男家過禮用品~
所以今日就去返《金都》二樓【凱麗】訂~
男家過禮用品：椰子兩對、檳榔兩對、青縷、扁柏、茶葉兩罐、龍鳳燭兩對、對聯兩對、禮金封套一對、禮金盒一個、四京果兩包(花生、紅豆、綠豆、合桃、紅棗、龍眼乾、芝麻、荔枝乾、百合蓮子)
另外，只係要四式海味，其他都係用利是代替...
而女家回俾男家o既用品都係會用利是代替...

另外，仲買埋男女家上頭用品，因為一次過買平d丫嘛~~^^

『天鵝』

天文台o係晚上9時40分發出o左2009年第二個8號風球 ──『天鵝』

唔知哩隻『黑天鵝』會唔會留到聽日變做『白天鵝』，等我聽日可以放下假呢~~^^

入伙禮物の二 ღ LCD電視機 by 二家姐二姐夫

之前二家姐話佢屋企多o左部電視機可以俾我地~

我地當然無任歡迎啦!!
可以買少樣，煩少樣，慳得就慳丫嘛~~

於是，二家姐二姐夫就趁今日入o黎探我地o既時候帶埋俾我地~
仲幫我地安裝埋呀~~
部電視機好新淨o架~都唔似用過o既~
真係非常多謝呀~~^^
而家有電視睇就唔洗咁悶喇~~呵呵~~

入伙大大大吉~~^0^v~~

今日正式入伙喇~~

雖然仲有d傢俬電器未買齊，不過我地唔想為o左趕住入伙而求求其其咁買，
我地會慢慢添置，睇o岩先買~

之前爸爸幫我地拜o左四角之後，就同我睇"通勝"，見今日係好日，適宜搬遷~
咁o岩今日係星期日所以方便d，唔洗特登請假~
又方便其他親戚朋友上o黎~
所以就揀o左哩日~^^
其實我地都未正式搬入去o架，只係做o左個儀式先，咁之後幾時入去住都得啦~~
所以我同Kenneth都只係帶o左幾件衫象徵式入伙咋~~

爸爸媽媽上晝11點就同我一齊去新屋會合Kenneth~
Kenneth就一早去o左supermarket買米、油、鹽、醬、醋、茶for入伙用~
入屋後，爸爸就幫我開風扇同煲水，象徵『風山水起』~
做完哩個簡單而隆重o既儀式之後，我地就一齊食飯~~
不過，我地都冇煮飯呀...
只係落樓下【百佳】買d即食餸上o黎食咋~~~
(哩個意見當然係由我o個個"無飯"媽媽提議o架啦...囧")
哈哈^^真係夠晒求其呀~~
不過而家好多o野都簡化晒lu，唔洗咁執著，最緊要心安理得o既o者~~
食完飯之後，爸爸媽媽就返屋企喇...
走之前，媽媽俾o左兩封利是我地(一人一封)呀~祝我地入伙大吉、身體健康、平平安安~
仲送o左兩盒【樂家杏仁糖】o添~佢話祝我地有個"快【樂家】庭"喎~~
多謝爸爸媽媽^^

而Kenneth o既大家姐&二家姐兩家人1點半左右就上o黎喇~~
大家姐個仔仔差不多兩歲喇~~
佢唔怕生保人o架，一入到屋就自己一個o係間屋四圍走，自得其樂，玩得好開心~~
好活潑呀~~
佢好似唔識攰咁o架~~
佢仲好鍾意同人玩，周不時會走o黎對住你笑o架~~好得意呀~~^^
二家姐都封o左一封利是俾我地~
真係好"大"封呀...成$3,000 o架...
我地都唔係幾好意思收咁多...想俾返佢地呀...
多謝大家姐大姐夫、二家姐二姐夫^^

今日真係好開心~~
因為我同Kenneth o既屋企人都好關心我地~~
一入伙就o黎探我地~~

又又買。家品@【IKEA】

為聽日入伙作最後衝刺!!!

行o左三轉呀...

腳跛手軟咩都齊...
o係【IKEA】買o左餐具、杯、隔熱墊...
不過總算買得七七八八喇...
冇錯~都仲係得七七八八咋...
仲有三三二二未買o架~~
不過主要用o既都買齊喇~~
但仍然要繼續努力~~

入伙禮物の二 ღ 包羅萬有 by 爸爸媽媽

電飯煲、水煲、風扇、菜刀、針板、衣架，仲有一大堆即棄餐具...

哩d全部都係爸爸媽媽一知我搵到新屋就買俾我o既o野...
真係好多...
由於係買俾個女用，所以個電飯煲係粉紅色o架~~
哈哈^^好搞笑~~

仲有，真係而家先知...
原來水煲係咁貴o架...
佢地仲要係買【Buffalo】，
如果俾我自己就會買個雜嘜算lu~~

同埋o個一大堆即棄餐具...
佢地係打算方便我地招呼朋友上o黎時用o既...
不過真係好多呀~
多到開幾次party都得呀~~哈哈^^

友囍‧有喜

今日收到Kelly o既電話，佢話唔做得我姊妹呀~

聽到哩個消息，我真係好開心呀~~
佢唔做得我姊妹o既原因，當然係因為有喜事啦~~
而有咩喜事...你地自己估下~
(因為佢都係尋日先知，就即刻通知我...
通常d老人家話唔可以咁快同人講o架...所以我都唔講~~
不過真係好恭喜佢呀~~)
佢仲同我講o左好多次唔好意思o添...不過我真係唔介意喎~~

另外，佢知我搵到新屋，
於是就問我想要咩...
我話唔洗啦~~留返d "XX"錢啦~~
不過佢仍然係三番四次咁問我，真係問o左我好多次...
雖然最後我都堅持唔要，
不過真係好多謝佢~~